مو كل مستثمر معه فلوس يستحق يدخل معك الشركة
مو كل مستثمر معه فلوس يستحق يدخل معك الشركة
من اكثر الاخطاء اللي ممكن يقع فيها المؤسس انه يركز على حجم الشيك وينسى الشيء الاهم
من هو الشخص اللي بيدخل معي جدول الملكية وكم نسبة الشركة اللي بعطيه اياها؟
التمويل مهم لكن المستثمر الملائكي ما يدخل معك لفترة مؤقتة
قد يبقى اسمه في جدول الملكية سنوات ويمر معك بجولات جديدة وقرارات كبيرة وتغييرات في المنتج والسوق وحتى في الفريق
عشان كذا اختيار المستثمر ما يكون على سؤال واحد
كم بيدفع؟
فيه اسئلة اهم
من هو؟
وش شروطه؟
كم النسبة اللي يطلبها؟
وش الصلاحيات المرتبطة بهذه النسبة؟
وش بيضيف بعد تحويل المال؟
وهل وجوده اليوم بيساعدك بكرة او يصعب عليك المراحل القادمة؟
1. ابدأ بالنسبة قبل ما تنبهر بحجم الشيك
شيك كبير ما يعني بالضرورة صفقة جيدة
العبرة بالقيمة اللي تدخل الشركة مقابل النسبة اللي تخرج من ملكية المؤسسين
ما يكفي تقول المستثمر سيدخل بمليون ريال
لازم تعرف كم تقييم الشركة قبل الاستثمار وكم تقييمها بعد الاستثمار وكم نسبة الملكية اللي سيحصل عليها وهل هذه النسبة منطقية بالنسبة لمرحلة الشركة
وما فيه نسبة مثالية ثابتة تصلح لكل استثمار ملائكي
النسبة تتحدد بحسب تقييم الشركة وحجم الاستثمار ومرحلتها وقوة التفاوض وشروط الصفقة
لكن المؤسس لازم ينتبه من البداية
لان النسبة اللي تتنازل عنها اليوم ما ترجع لك بسهولة ومع كل جولة جديدة راح يحصل تخفيف جديد لحصص المساهمين
لذلك لا تنظر للنسبة الحالية فقط
انظر كيف بيكون جدول الملكية بعد جولتين او ثلاث
2. لا تنظر للنسبة وحدها شوف الحقوق اللي معها
ممكن مستثمر يملك نسبة صغيرة لكن الشروط تعطيه صلاحيات اكبر بكثير من حصته
هنا تبدأ المشكلة
راجع هل له حقوق موافقة على قرارات معينة
هل يستطيع ايقاف قرارات مهمة
هل يطلب مقعدا في مجلس الادارة
هل له حقوق خاصة في الجولات القادمة
وهل فيه بنود قد تؤثر على دخول مستثمر جديد
الحوكمة مهمة وحماية المستثمر حق مشروع
لكن فيه فرق بين حماية الاستثمار وبين اعطاء مستثمر ملائكي قدرة غير متناسبة على التأثير في الشركة
لا تسأل فقط كم نسبته
اسأل ماذا يستطيع ان يفعل بهذه النسبة
3. افحص المستثمر مثل ما يفحصك
المستثمر غالبا بيسأل عنك
عن السوق
والمنتج
والفريق
والارقام
والعقود
وجدول الملكية
ويمكن يسأل اشخاص تعاملوا معك سابقا
وانت ايضا من حقك تسأل عنه
ارجع لمؤسسين سبق ان استثمر معهم
واسألهم بشكل مباشر
هل كان واضحا في شروطه
هل التزم بما وعد
هل تدخل في التشغيل
كيف كان وقت الخلاف
كيف كان وقت تعثر الشركة
وهل اضاف فعلا بعد الاستثمار
والاهم
اذا رفض او تحفظ بلا سبب واضح على تواصلك مع مؤسسين سبق ان استثمر معهم فهذه اشارة تستحق التوقف عندها
مثل ما يعمل هو فحصه عليك اعمل انت فحصك عليه
4. فرق بين العلاقات وبين القيمة
من اكثر العبارات اللي يسمعها المؤسس
عندي علاقات
اقدر افتح لك السوق
اعرف فلان
اقدر اوصلك لجهات كبيرة
اقدر اساعدك في الجولة القادمة
جميل
لكن السؤال
وش اللي سبق وفعله فعلا؟
هل ساعد شركة في الوصول لعميل مهم
هل فتح شراكة
هل جاب شخصا مهما للفريق
هل ساعد في جولة لاحقة
هل عنده خبرة يحتاجها نشاطك
شبكة العلاقات بحد ذاتها ما تكفي
المهم قدرتها على التحول الى قيمة للشركة
5. شوف هل يفهم دوره كمستثمر
من حق المستثمر يسأل ويناقش ويعترض ويحمي استثماره
لكن فيه فرق بين مستثمر يدعم الادارة ومستثمر يريد ان يصبح ادارة ثانية
اذا بدأ من اول الطريق يدخل في التشغيل اليومي ويتدخل في كل صغيرة وكبيرة ويريد ان تمر القرارات من خلاله لا تتجاهل الاشارة
خصوصا اذا كانت حصته محدودة
المستثمر الجيد يعرف متى يتدخل ويعرف ايضا متى يترك للمؤسس مساحة يدير شركته
6. افهم افقه الزمني
مو كل مستثمر يناسب كل مؤسس
يمكن انت تبني شركة على مدى سنوات وهو يبحث عن فرصة تخارج قريبة
يمكن انت تريد نمو متزن وهو يريد تسارع كبير حتى لو ارتفعت المخاطر
ما فيه مشكلة في اختلاف الاستراتيجيات
المشكلة ان تكتشف هذا الاختلاف بعد ما يدخل جدول الملكية
لذلك ناقش من البداية
وش نظرته للنمو
متى يتوقع الجولة التالية
وش نظرته للتخارج
وش موقفه اذا احتاجت الشركة وقتا اطول من المتوقع
7. فكر في المستثمر اللي بعده
هذه من النقاط اللي كثير من المؤسسين ما ينتبهون لها
قبل ما تدخل مستثمرا اليوم اسأل نفسك
كيف سينظر له المستثمر القادم؟
هل شروطه طبيعية
هل حقوقه قابلة للتعايش مع جولة مؤسسية
هل وجوده في جدول الملكية يعطي ثقة
او بيبدأ الصندوق القادم يطلب منك تعديل اتفاقيات قديمة قبل الاستثمار
احيانا المستثمر الملائكي ما يسبب لك مشكلة اليوم
المشكلة تظهر بعد سنة لما تبدأ الجولة التالية
عشان كذا لا تفاوض على الجولة الحالية وكأنها اخر جولة في عمر الشركة
مؤشرات ايجابية
- شروطه واضحة من البداية
- النسبة اللي يطلبها منطقية مقابل الاستثمار والتقييم
- حقوقه وصلاحياته متناسبة مع حصته
- عنده سجل استثماري يمكن التحقق منه
- يسمح لك بالتواصل مع مؤسسين سبق ان استثمر معهم
- عنده قيمة فعلية بعد المال
- يفهم القطاع او مرحلة الشركة
- يحترم دور المؤسس والادارة
- عنده افق زمني متوافق مع طبيعة الشركة
- شروطه ما تعقد عليك الجولات القادمة
مؤشرات تستدعي الحذر
- يطلب نسبة كبيرة مقابل استثمار محدود
- يربط النسبة الصغيرة بصلاحيات واسعة
- يريد حق ايقاف قرارات مهمة بشكل غير متناسب مع حصته
- يضغط عليك للتوقيع بسرعة
- وعوده كثيرة لكنها غير مكتوبة او غير قابلة للتحقق
- يبالغ في علاقاته بدون نتائج سابقة
- يرفض رجوعك لمؤسسين سبق ان استثمر معهم
- يحاول الدخول في التشغيل من البداية
- يطلب حقوقا ما تناسب مرحلة الشركة
- شروطه قد تصعب دخول مستثمر مؤسسي لاحقا
وفي النهاية
ما تقدر تعرف المستثمر بالكامل من جلسة او جلستين
هو بشر والظروف تتغير وقد تتغير قدرته او اولوياته او حتى توجهه الاستثماري مع الوقت
لكن تقدر تقلل الخطأ
اعرف سمعته
راجع شروطه
دقق في النسبة
افهم الصلاحيات المرتبطة بها
واسأل عن القيمة اللي بيضيفها بعد المال
ولا تنظر فقط الى قيمة الشيك
لان الشيك يدخل مرة واحدة
لكن النسبة تبقى في جدول الملكية
والشريك قد يبقى معك سنوات
لذلك المستثمر الجيد مو فقط اللي يناسب شركتك اليوم
المهم يكون وجوده في جدول الملكية يساعدك في المراحل القادمة وما يصعب عليك قراراتك او جولاتك المستقبلية
لا تفاوض على الشيك وحده
فاوض على الشيك والنسبة والحقوق وما سيبقى لك بعد الجولات القادمة
تعليقات
إرسال تعليق